Dit was vir my groot voorreg en eer om die Hoof te word van my Almamater, Hoërskool Sand du Plessis. Ek is 100% oortuig dat dit is waar die Here my wil hê en ek gaan baie hard werk om my roeping as Hoof ten volle te vervul.
Sannies is ʼn skool met ʼn ryke tradisie en ʼn trotse geskiedenis. Ons vier ons 50ste verjaarsdag in 2016 ! Die impak wat oud-leerlinge in Bloemfontein, die Vrystaat, Suid-Afrika en selfs die wêreld gemaak het, is feitlik onmeetbaar. Ek het in die dae na die bekendmaking van my aanstelling diep onder die indruk gekom van die geweldige groot groep leerders, oud-leerders, ouers en oud-ouers wat ʼn diep liefde vir ons skool het. Dit maak my baie opgewonde oor die toekoms.
Sand du Plessis was nog altyd en is nog steeds baie trots op die kaliber kind wat ons in die wêreld instuur. Ons werk hard daaraan om te verseker dat kinders die waarde van harde werk as voorwaarde vir sukses besef. Elke onderwyser by Sannies is opgewonde oor die skool en sy kinders. Elke kind is kosbaar en verdien om raakgesien te word. U kind sal nooit net ʼn nommer in ʼn massa wees by Sannies nie.
Leerders van Sannies verstaan die betekenis van waardes soos: Trots op jou skool, Integriteit, Eerlikheid, Eer, Goeie maniere en om nie Arrogant te wees nie.
ʼn Keuse om jou kind na Hoërskool Sand du Plessis te stuur sal groot dividende vir u as ouer oplewer oor baie jare. Kom besoek gerus ons skool en vergewis u van die feite. Enige ouer of persoon wat dit oorweeg om sy kind in Sand du Plessis te plaas is welkom om my te kom sien. My deur staan oop vir u !
Mnr. W du Buisson, Skoolhoof
